१४ भाद्र, धनकुटा । जिल्ला अस्पताल धनकुटामा पिसिआर परीक्षण हुने भएको छ । स्वास्थ्य कार्यालय धनकुटाका प्रमुख तुलसीप्रसाद गुरागाईका अनुसार संघीय सरकारले पीसीआर परिक्षण मेसिन खरिद गर्न एक करोड बजेट पठाएको छ ।
पिसिआर परिक्षण मेसिन जडानका लागि बजेटको सिलिङ आएको र अब खरिद प्रक्रिया सुरु भएको गुरागाईले बताउनुभयो ।
धनकुटामा पिसिआर परिक्षण मेसिन जडान भएपछि कोशी पहाडी जिल्ला धनकुटासहित तेह्रथुम, संखुवासभा र भोजपुरको स्वाब परिक्षण गरिने भएको छ ।
स्वास्थ्य तथा जनसंख्या मन्त्रालयले गएको असार १२ गते र कोरोना संक्रमण रोकथाम, नियन्त्रण तथा उपचार कोष सञ्चालक समितिले गत भाद्र २ गते धनकुटामा पिसिआर परिक्षण मेसिन राख्ने निर्णय गरेको गरेपछि बजेट निकासा भएको हो ।
कोशी पहाडी जिल्लामा पिसिआर परिक्षण मेसिन नहुँदा यी जिल्लामा संकलित स्वाब बीपी कोइराला स्वास्थ्य विज्ञान प्रतिष्ठान धरान पठाउने गरिएको थियो । जसले गर्दा रिपोर्ट ढिलो आउने तथा संकलित स्वाब हराउने गरेको छ । धनकुटामा पछिल्लो समय आइसोलेसन तयारी हुनु र पिसिआर परीक्षण गर्ने मेसिन सञ्चालकको पनि तयारी हुनुले केही राहत महसुस भएको स्थानीयले बताएकाछन् ।
धनकुटामा पिसिआर परिक्षण मेसिन जडान गर्न कोशी पहाडी जिल्लाका प्रतिनिधीसभा सदस्यहरुको विशेष पहलमा सम्भव भएको धनकुटाका प्रतिनिधीसभा सदस्य राजेन्द्र राईले बताउनुभयो ।
कोशी पहाडका प्रतिनिधीसभा सदस्यहरु धनकुटा राईसहित तेह्रथुमका भवानी खापुङ, संखुवासभाका राजेन्द्र गौतम र भोजपुरका सुदन किरातीँले पटकपटक स्वास्थ्य मन्त्री भानुभक्त ढकाललाई भेटेर पहल गरेको धनकुटाका प्रतिनिधीसभा सदस्य राईले बताउनुभयो । पटकपटकको पहलपछि स्वास्थ्य तथा जनसंख्या मन्त्रालयले गएको असार १२ गते र कोरोना संक्रमण रोकथाम, नियन्त्रण तथा उपचार कोष सञ्चालक समितिले गत भाद्र २ गते धनकुटामा पिसिआर परिक्षण मेसिन राख्ने निर्णय गरेको उहाँले बताउनुभयो ।
सूचना विभाग दर्ता नंः १८२३/०७६-७७