५ फागुन, काठमाडौं । आयोजक नेपाल एपीएफ स्कुल र नेपाल पुलिस स्कुल कीर्तिपुरमा जारी प्रथम अन्तर विद्यालय सशस्त्र प्रहरी महानिरीक्षक रनिङ ट्रफी फुटबल प्रतियोगिताको उपाधिका लागि भिड्ने भएका छन् ।
शनिबार सम्पन्न प्रतियोगिताको पहिलो सेमिफाइनल खेलमा नेपाल एपीएफ स्कुल कीर्तिपुर क टिमले मनकामना सेकेण्डरी स्कुल जोरपाटीलाई ४–० गोल अन्तरले पराजित गर्दै उपाधि नजिक पुगेको हो ।
नेपाल एपीएफ स्कुलको तर्फबाट विकास बोहोराले २ तथा तेन्जिङ्ग शेर्पा र रोहित गोलेले समान १–१ गोल गरे । विकास बोहोरा म्यान अफ दि म्याच चुनिए ।
शनिबार नै सम्पन्न दोस्रो सेमिफाइनल खेलमा नेपाल पुलिस स्कुल, साँगाले सैनिक आवासीय महाविद्यालय, सल्लाघारीलाई ट्राइबेकरमा ३–२ गोल अन्तरले पराजित गरी फाइनलमा प्रवेश गर्याे । खेलमा दिप्सन परियार उत्कृष्ठ खेलाडी चुनिए ।
प्रतियोगिताको फाइनल खेल सोमबार मध्यान्ह १२ बजे हुने तालिका रहेको छ ।
प्रतियोगिताको उपाधि विजेताले ५० हजार नगद पुरस्कार पाउनेछ ।
प्रतियोगितामा काठमााडौं उपत्यकाका १७ र काभ्रे जिल्लाबाट एक गरी कुल १८ वटा विद्यालयहरुका १९ टिमबीच लिग कम नकआउट आधारमा खेलहरु सञ्चालन भएको थियो ।
सूचना विभाग दर्ता नंः १८२३/०७६-७७