२६ फाल्गुन, सुनसरी । भारतबाट तस्करी गरेर ल्याइएको ब्रोइलर कुखुरामा प्रयोग गरिने औषधिजन्य भिटामिन प्रहरीले विराटनगरबाट बरामद गरेको छ ।
विराटनगर महानगरपालिका १६ स्थित केसलिया खोलानजिकबाट सशस्त्र प्रहरी बल बिओपी बखरीका प्रहरी निरीक्षक दिलकुमार पन्त नेतृत्वको टोलीले मङ्गलबार दिउँसो भिटामिन बरामद गरेको हो ।
सशस्त्र प्रहरी बल मोरङका प्रमुख एसपी तीर्थ पौडेलका अनुसार एक सय मिलीलिटर दरका चार सय ३३, दुई सय मिलीलिटरका एक सय ४८ र पाँच सय मिलीलिटरका एक सय ८६ बोतल भिटामिन बरामद भएको हो । सशस्त्रले तस्करीमा प्रयोग गरेको चारवटा साइकलसहित तीन लाख मूल्यभन्दा बढीको भिटामिन नियन्त्रणमा लिएको हो ।
सशस्त्र प्रहरीलाई देख्नासाथ साइकलसहित भिटामिन छाडेर तस्करीहरु भागेको एपसी पौडेलले बताउनुभयो ।
बरामद भएको भिटामिनमध्ये पाँच सय मिलीलिटरको प्रतिबोतलमा मूल्य ६ सय ९० भारतीय रुपैयाँ उल्लेख गरिएको छ । जसको नेपाली १ हजार १ सय ४ रुपैयाँ हुन्छ । प्रतिबोतल दुई सय मिलीलिटरको तीन सय ६० र एक सय मिलीलिटरको १ सय ८५ भारतीय रुपैयाँ पर्ने उल्लेख छ ।
बरामद गरिएका औषधि सशस्त्र प्रहरीले विराटनगर भन्सार कार्यालयमा बुझाएको छ ।
सूचना विभाग दर्ता नंः १८२३/०७६-७७