१ माघ, काठमाण्डौँ । नेपाल कम्युनिष्ट पार्टी (नेकपा)का राष्ट्रियसभा सांसदहरूको लेबी काटिन छाडेको छ । नेकपाका सांसदहरूको तलबबाट मासिक १२ हजार रुपैयाँ लेबी काटिएर पार्टीको बैंक खातामा जाने गरेको थियो । तर, यसपटक लेबी नकाटेरै संघीय संसद सचिवालयले तलब पठाएको जनाएको छ ।
केही साता अघि प्रचण्ड–माधव समूहका १९ जना सांसदले पत्र लेखेर संसद सचिवालयलाई लेबी नकाटिदिन आग्रह गरेका थिए । त्यसबाहेक अन्यको पनि कता पठाउने हो भन्ने यकिन नभएपछि नेकपा सांसदहरूको लेबी नकाटिएको संसद सचिवालयका प्रमुख लेखा नियन्त्रक वसन्तराज सिग्देलले जानकारी दिनुभयो ।
गत पुस १२ गते प्रचण्ड–माधव समूहले बिभिन्न बैंकहरूलाई पत्राचार गर्दै पार्टीको नाममा रहेको बैंक खाता रोक्का गर्न आग्रह गरेका थिए । तत्कालीन नेकपा एमाले र माओवादी केन्द्र एकीकरण भएर नेकपा बनेको भए पनि संघीय संसद सचिवालयमा संयुक्त बैंक खाता बुझाएका थिएनन् । जसले गर्दा दुवै पार्टीको बैंक खाता फरक–फरक रुपमै सञ्चालित थिए ।
संसद सचिवालयका अनुसार तत्कालीन एमालेका सांसदको लेबी नबिल बैंकको खातामा जान्थ्यो भने तत्कालीन माओवादी केन्द्रका सांसदहरूको लेबी भने एभरेस्ट बैंकको खातामा जान्थ्यो ।
सूचना विभाग दर्ता नंः १८२३/०७६-७७