इलाम । चुलाचुली गाउँपालिका–५ मा पछिल्लो समय जंगली बादरको आतंक बढ्दै गएको छ । बादरले खेतीबालीमा व्यापक क्षति पुर्याउन थालेपछि स्थानीय किसानहरू आजित बनेका छन् ।
स्थानीयका अनुसार बादरले बाँसको तामा, साना अनारसका चिचिला, कोरेसाबारीमा लगाइएका विभिन्न तरकारी तथा केराखेती पाक्नै नदिई खाइदिने गरेको छ । यति मात्र होइन, मकै फल्ने समयमा मकैका घोगा सखाप पार्ने र धान पाक्ने बेला बाला नै सुर्क्याएर खाने गरेका कारण किसान आजित छन ।
चुलाचुली–५ की स्थानीय तारा राईले जंगली बादरका कारण खेतीपाती जोगाउन निकै कठिन भएको बताइन् । “लगाएको बाली मज्जाले पाक्न पाउदैन, बादरले बारिमै नोक्सान गरिदिन्छ,” उनले भनिन्।
त्यस्तै, चुलाचुली–५ कै पर्वत राईले पछिल्लो समय क्षेत्रमा जंगली बादरको संख्या उल्लेख्य रूपमा बढेको र आतंक पनि चुलिँदै गएको बताए । उनका अनुसार किसानले दिनरात बाली कुरेर बस्नुपर्ने अवस्था सिर्जना भएको छ।
स्थानीयहरूले जंगली बादर नियन्त्रण तथा किसानको खेतीबाली संरक्षणका लागि सम्बन्धित निकायले तत्काल प्रभावकारी पहल गर्नुपर्ने माग गरेका छन्।
सूचना विभाग दर्ता नंः १८२३/०७६-७७