१० फाल्गुन, काठमाण्डौँ । मेलम्ची खानेपानी आयोजनाको साढे २६ किलोमिटर सुरुङमा आजबाट फेरि पानी भर्न थालेर परीक्षण सुरु गरिएको छ । खानेपानी मन्त्रालय र मेलम्ची खानेपानी विकास समितिले आवश्यक सम्पूर्ण प्राविधिक काम पूरा गरेसँगै पानी हालेर परीक्षण थालेको आयोजनाले बताएको छ ।
खानेपानी मन्त्री मणि थापा, युवा तथा खेलकुद मन्त्री दावा तामाङ, सहरी विकास राज्यमन्त्री रामवीर मानन्धर र पूर्व कानुन मन्त्री शेर बहादुर तामाङलगायतको टोलीले आज स्विच थिचेर पानी भर्ने थालनीको शुभारम्भ गर्नुभएको हो ।
आयोजनास्थल अम्बाथान सुरुङमा नै औपचारिक कार्यक्रम गरेर काम अगाडि बढाइएको छ । गत असार २१ गतेबाट पानी परिक्षण सुरु गरेको आयोजनाले ३० गते १७ नम्बर गेट फुटेर परिक्षण स्थगित गरिएको थियो ।
सो घटनामा दुई जनालाई खोलाले बगाएको समेत थियो । दुई जना मध्ये एक जनाको शव फेला परेको छ भने एक जनाको शव शव अझै फेला परेको छैन ।
आयोजनाको मुख्य दातृ निकाय एसियाली विकास बैङ्क (एडिबी)को अनुदान सहयोग अन्तर्गत चार जना विशेषज्ञको टोलीले सुरुङ, मुहान स्थल, गेटलगायत संरचनाको पुनः जाँच गरेको थियो । आयोजनाका कार्यकारी निर्देशक तिरेश खत्रीका अनुसार विशेषज्ञहरूले निरीक्षण गरिसकेका छन् । उहाँका महत्त्वपूर्ण सुझावलाई समावेश गरी पुनः परीक्षणका लागि तयार गरिएको उहाँको भनाई छ ।
विगतको जस्तो दुर्घटना नहोस् भन्नका लागि आयोजनाले यसपालि विशेष सतर्कता अपनाएको निर्देशक खत्रीले बताउनुभयो । परीक्षणका क्रममा हेलिकोप्टरलाई तयारी अवस्थामा राखिएको छ । उद्धार योजना बनाएर धुलिखेल तथा काठमाडौँका विभिन्न अस्पतालहरूसँग समन्वय गरिएको छ ।
निर्देशक खत्रीका अनुसार सिन्धुपाल्चोकको मेलम्ची खोलादेखि काठमाडौँको सुन्दरीजलसम्मको साढे २६ किलोमिटर सुरुङ भर्न १६ दिन लाग्नेछ । सुरुवाती चरण भएकाले सुरुङको क्षमताअनुसार पानी नछाडिने उहाँले बताउनुभयो ।
त्यस्तै पानी परीक्षणको शुभारम्भ गर्नुहुँदै मन्त्री थापाले पानी काठमाडौँ लगेर वितरण गर्न सकियो भने ठुलो उपलब्धि हासिल हुने बताउनुभयो । उहाँले आयोजनाको बारेमा आफुलाई खासै ज्ञान नभएको भन्नुहुँदै सचिव र इन्जिनियरहरूसँग समन्वय गरिरहेको बताउनुभयो ।
पूर्व कानुन मन्त्री शेरबहादुर तामाङले पानी पथान्तरण गरिसकेपछि जिल्लावासीले पाउने लेभिको टुङ्गो छिट्टै लाग्ने विश्वास व्यक्त गर्नुभयो । उहाँले पानी लगिसकेपछि काठमाडौँले सिन्धुपाल्चोकको विकास निमार्णको काममा उच्च प्राथमिकता दिनुपर्नेमा जोड दिनुभयो ।
खानेपानी मन्त्री मणि थापा, युवा तथा खेलकुद मन्त्री दावा तामाङ, सहरी विकास राज्यमन्त्री रामवीर मानन्धर विघटित प्रतिनिधिसभा सदस्य शेरबहादुर तामाङलगायतको उपस्थितिमा सुरुङमा पानी हालेर परीक्षण गरिएको हो ।
सूचना विभाग दर्ता नंः १८२३/०७६-७७