२२ पौष, काठमाण्डौँ । प्रतिनिधिसभा बिघटनविरुद्ध परेको रिटमा गठन भएको संवैधानिक इजलासमा एकजना न्यायाधीशले नबस्ने घोषणा गरेका छन् । न्यायाधीश हरिकृष्ण कार्कीले इजसालमा नबस्ने घोषणा गर्नुभएको हो ।
कार्कीलाई इजलासमा राखिएपछि कानुन व्यवसायीहरुले प्रश्न गर्दै आएका थिए । उहाँ विगतमा प्रधानमन्त्री केपी शर्मा ओलीले महान्यायाधिवक्ता नियुक्त गरिसक्नुभएको थियो । वरिष्ठ अधिवक्ता दिनेश त्रिपाठीले लगायतले न्यायाधीश कार्कीलाई इजलासमा राखिएकोमा प्रश्न उठाउँदै आएका थिए । आज पनि उहाँले यसबारे प्रश्न उठाउनुभएको थियो ।
वरिष्ठ अधिवक्ताहरुले कार्कीमाथि प्रश्न उठाउँदा प्रधानन्याायधीश चोलेन्द्र शमशेर जबराले आफूलाई पनि ओलीले नियुक्त गरेको भन्छन् भनी प्रतिप्रश्न गर्नुभएको थियो । तर, वरिष्ठ अधिवक्ता त्रिपाठीले प्रधानन्यायाधीश प्रधानमन्त्रीले नियुक्त नगर्ने स्पष्ट पार्नुभयो ।
बारम्बार कार्कीबारे प्रश्न उठेपछि प्रधानन्यायधीशसहित पाँचजना न्यायाधीश बहस रोकेर छुट्टै छलफलमा बसेका थिए । त्यसपछि कार्कीले मुद्दा नहेर्ने घोषणा गर्नुभयो ।
यसअघि प्रतिनिधिसभा बिघटनमाथि परेको रिटमा प्रधानन्यायाधीश चोलेन्द्र शमशेर जबराले आफूसहित संवैधानिक इजलाशमा न्यायाधीशहरु हरिकृष्ण कार्की, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसीलाई राख्नुभएको थियो ।
सूचना विभाग दर्ता नंः १८२३/०७६-७७