३२ जेष्ठ, काठमाण्डौँ । गुल्मीमा कोरोना सङ्क्रमित एक क्यान्सर रोगीको मृत्यु भएको छ । रेसुङ्गा नगरपालिकाको आइसोलेसनमा राखेर उपचार गराइरहेका धुर्काेट गाउँपालिकाका ३६ वर्षीय पुरुषको हिजो राती १० बजे मृत्यु भएको रेसुङ्गा नगरपालिकाका स्वास्थ्य संयोजक बोम अर्यालले जानकारी दिनुभयो ।
मृतक व्यक्तिमा जेष्ठ १२ कोरोना सङ्क्रमण पुष्टि भएसँगै रेसुङ्गा नगरपालिकाको आइसोलेसनमा राखेर उपचार गरिएको थियो । उनी विगत २ वर्षदेखि क्यान्सर रोगले पीडित थिए ।
केही दिनअघिदेखि उहाँको स्वास्थ्य अवस्था गम्भीर थियो । आइसोलेसनको बेडमा जान र झर्न नसक्ने भएपछि उनको भुइँमै राखेर उपचार गरिएको थियो ।
गुल्मीमा यसअघि कोरोना सङ्क्रमणकै कारण मदाने गाउँपालिका वडा नं ६ का ४१ वर्षीय शिक्षकको रुपन्देहीको क्रिमसन अस्पतालमा उपचारको क्रममा ज्यान गएको थियो ।
यस्तै सुदूरपश्चिम प्रदेशमा एकै दिन ६४ जनामा कोभिड–१९ का संक्रमित थपिएपछि सक्रिय संक्रमितको संख्या २ सय २४ पुगेको छ । हिजो सेती प्रादेशिक अस्पतालको कोभिड–१९ प्रयोगशालामा गरिएको परीक्षणबाट थप ६४ जनामा कोरोनाभाइरसको संक्रमण पुष्टि भएको हो । यसअघि नै २६ जना संक्रमित निको भइ घर गइसकेका छन भने २ जना संक्रमितको मृत्यु भइसकेको छ ।
सूचना विभाग दर्ता नंः १८२३/०७६-७७