२८ वैशाख, काठमाण्डौँ । नेपालमा कोरोना भाइरसको संक्रमित संख्या ११० पुगेको छ । आज विहान थप एक जना संक्रमित थपिएको स्वास्थ्य मन्त्रालयले जानकारी दिएपछि संक्रमित संख्या ११० पुगेको हो ।
आज पत्ता लागेका संक्रमित उदयपुरको भुल्केकी ४३ वर्षीया महिला हुन् । उदयपुरको भुल्केस्थित मस्जिदमा यसअघि संक्रमितको सम्पर्कमा आएकी ती महिलाको कोशी अस्पताल विराटनगरमा परीक्षणका क्रममा संक्रमण पत्ता लागेको हो । उदयपुरको भुल्के नेपालमा कोरोना भाइरसको केन्द्रबिन्दु बनेको छ ।
हालसम्म नेपालमा संक्रमितमध्ये ७८ पुरुष र ३२ महिला रहेको स्वास्थ्य मन्त्रालयले जनाएको छ । महिलाको भन्दा संक्रमित पुरुषको संख्या दोब्बर हुनु अध्ययनको विषय बनेको छ ।
यता कोरोनाभाइरसबाट विश्वभर ७८ नेपालीको मृत्यु भएको छ । विश्वभर शनिबारसम्म सो संख्यामा नेपालीको मृत्यु भएको गैरआवासीय नेपाली संघ (एनआरएनए) अन्तर्गतको स्वास्थ्य समितिले जनाएको छ ।
समितिले विश्वभर कोरोनाबाट प्रभावित नेपालीबारे तथ्यांक संकलन गर्दै आएको छ । तथ्यांकअनुसार सबै भन्दा बढी बेलायतमा ५१ जनाको मृत्यु भएको छ ।
यस्तै अमेरिकामा कोरोना भाइरसका कारण ज्यान गुमाउनेको संख्या १५ पुगेको छ । समितिका अनुसार न्युयोर्कमा १२, कोलोराडोमा २ र भर्जिनियामा १ जनाको मृत्यु भएको हो ।
यस्तै, संयुक्त अरब इमिरेट्स्ट (युएई) मा ६, आयरल्याण्डमा १, जापानमा १, टर्कीमा १, नेदरल्याण्डमा १, बहराइन १ र स्वीडेन १ जनाको कोरोना भाइरसका कारण ज्यान गएको समितिका संयोजक डा. संजिव सापकोटाले जानकारी दिनुभयो ।
संयोजक डा. सञ्जीव सापकोटाका अनुसार नेपाल बाहेक विश्वभर ५ हजार ४ सय ७२ जना गैरआवासीय नेपालीहरु कोरोनाबाट संक्रमित भएका छन् । संक्रमितमध्ये २ हजार भन्दा बढी नेपालीहरु कोरोना भाइरसबाट मुक्त भएको अनुमान सो समितिले गरेको छ ।
विश्वभर छरिएका गैरआवासीय नेपाली विज्ञ चिकित्सहरुको समूहले तयार पारेको सो आँकडा अनुसार ९ देशमा गैरआवासीय नेपालीहरुको ज्यान गएको छ भने बाँकी २० देशमा रहेका नेपालीहरु कोरोना भाइरस (कोभिड १९) बाट संक्रमित छन् ।
समितिका अनुसार कतार २ हजार ३ सय, अमेरिकामा १ हजार ५ सय, युके १ हजार, बहराइनमा २ सय ४५, युएईमा १ सय ४९, कुवेतमा ७८, नेपाल १०९, साउदी अरबमा ३०, पोर्चुगलमा २६, आयरल्याण्डमा २२, स्पेनमा १२, अष्टे«लियामा १२, बेल्जियममा ६, जापानमा १०, स्वीडरल्याण्डमा ५, क्यानाडामा १०, जर्मनीमा ४, फिनल्याण्ड ४, साईप्रसमा ३, मलेसियामा ४९, न्युजिल्याण्डमा ३, माल्दिभ्समा २, माल्टामा २, हङ्गकंङ्गमा २, म्यानमारमा १, फ्रान्समा १ जना गैरआवासीय नेपालीलाई कोरोना संक्रमण भएको छ ।
नेपालमा भने ११० जनामा कोरोनाको संक्रमण देखिएको छ जसमा ३१ जना निको भएर घर फर्किएका छन् ।
सूचना विभाग दर्ता नंः १८२३/०७६-७७